Kon komunidades sefaradis vibrantes en los Estados Unidos i un resurjimento rezin de interes relasionado al djudeo-espanyol, la Liga Amerikana del Ladino (LAL) rekonose ke mos topamos frente un momento dechizivo en la istoria de la lingua. Ancheando los esforsos nasionales para dokumentar, prezervar, i revitalizar el ladino, la Liga Amerikana del Ladino ofre oportunidades i manaderos unikos destinados a un rango de avlantes i elevos, los kuales inkluyen sefaradim kon o sin kapachidades linguistikas indemas de akeyos ke no sean sefaradim ama les interesan ambezarsen mas. Perkuramos de ofrir apoyo aksesivle, konsultativo, kolaborativo, i finansiario a inisiativas inovadoras del ambezamiento del djudeo-espanyol de una jenerasion a la otra en multiples plataformas. Esta organizasion puvlika se engaja kon todos los interesados en el djudeo-espanyol para dar kavod a la erensia sefaradi del pasado indemas de akeyos ke sigen avlando o estudiando la lingua agora i en el avenir.
El koronavirus kreo una komunita global de elevos kon el dezeo de ambezarsen el ladino, i demostro ke los maestros de la lingua pueden adaptar sus metodos i materiales para la era del ambezamiento virtual. La Liga Amerikana del Ladino se topa en una pozision unika para ofrir apoyo personalizado para los menesteres de los elevos de la lingua oy dia i sus instruktores, sea en persona o sea en linea. Aktividades ke dezvelopan muestra komunita i ke krean un senso de koneksion kon otros avlantes de la lingua son esensiales para la kontinuasion de la lingua. Al organizar oportunidades para elevos de niveles diversos para interaktuar, echar lashon, i ambezarsen sovre la kultura sefaradi i el ladino, endjuntos, en tiempo real, la Liga Amerikana del Ladino se esforsa a mantener el momentum de este “boom” rezin de estudios de la lingua. Kreemos ke estabilir una organizasion nasional kon este rolo komplementara de modo efikas el rango de aktividades relijiozas i kulturalas sefaradis disponivles oy dia en los Estados Unidos.
Dr. Bryan Kirschen
Rachel Amado Bortnick
Hannah Pressman
Comments