Mis nonos, djenitores de mi madre ke vinieron de Bulgaria i de Turkiya, moravan en El Bronx ande se moravan djente de Izmir, Rodes, Edirne, i Estambol.
Es posivle ke vash a konoser este vizindado–esta serka de la kaye sien i setenta i de una eskalera de 132 skalones! Agora es muy famoza porke es una importante parte del filmo “The Joker.” Kada dia ay mansevos vistidos komo El Joker, bailando i tomando fotos de la eskalera. Kuando era kriatura, suvia los skalones para ir a Anderson Avenue a vijitar a mi papu i bava. No ay otra eskalera en New York City tan grande, tan pesgada!
Muncho anyos atras, puede ser en los 1930’s o 1940’s, mi papu tenia un ristorante sefardi en el mizmo vizindado. Kada dia el gizava kon kalderas “Este Boy,” yeno de favas, albondigas, bamyas, arroz, i lentejas. No avia menu–solamente se iva a la kuzina i dizia, “Kero fasulya kon albondigas” o “Kero meyoyo kon limon i prishil.”
Mansevos vinian para komer, echar lashon kon amigos muevos o bushkar echo. Tenian eskarinyo de sus famiyas en Turkiya i por la komida de kaza. Ma la djente del ristorante era una famiya.
Agora mi prima Suzie (Sultana Toldeo Camhi Reissman), noventa i sesh anyos, se akodra ke kuando era manseva iva al ristorante “JPilossof (Juda’s),” el de mi papu! Kada dia, despues de la skola, kuando eya estava asperando a sus djenitores, gozava su komida favorita: arroz kon leche o sutlach. [Suzie murio en Avril 2022]
Munchos anyos atras enkontri a dos viejizikas en mi keila ke moravan en El Bronx. Anyos i Panyos. El padre de la una tenia panaderia (Beraha’s) i el otro tenia kasher kasap or karneseria (Mizrahi’s). Los dos echos estavan muy serka del ristorante de mi papu. Mundo chiko!
Durante el 1940’s mi madre estava lavorando en el ristorante de mi papu, su padre. Enkontro a un mansevo muy ermozo– mi padre, ke estava komiendo aya. El se namoro de eya i se kazaron en 1946: Sarah Pilossof i Albert E. Arditti. Eyos fueron miembros del Etz Chaim Society, agora un parte de La Ermandad Sefaradi.
Alguna vezes, cuando era kriatura, fuimos a la keila de mis nonos en el mizmo vizindado–el kaye 169. Avian dos personas famosas:
El Haham Ascher Murciano, de bendicha memoria, i Murray Perahia. Agora es una pianista muy famoso, ma en el akel tiempo era kantador en el koro de mansevikos Despues de la keila en Shabat, ívamos al Boyero, un ristorante chikitiko kon komidas muy savrosas. Todos echando lashon en spanyol, riyendo i aziendo keyf: ‘Ya Komimos i Bevimos i Dishimos kon Salut.’ Ansina fue!
No ay Djudios en el vizindado oy. Agora la keila se izo una mezkita. Ma tengo buenos rekuerdos de los dias en El Bronx, i ay una koza muy spesial: el vizindado es el mizmo ande moravan mi profesora i mi amiga, Gloria Ascher, i su famiya.
Comments