Oy en dia en Izmir biven solo mil djudios entre mas de 4 milyones de povlasion. Ma un tiempo, antes del establesimiento del estado de Israel, kuando la sivdad tenia 200,000 personas, a lo menos 10% de eyos eran djudios. Kijo dizir ke desde entonses, munchas fraguas djudias – sovre todo sinagogas – fueron abandonadas, i institusiones komo eskolas, aziles de viejos, i ospital fueron serradas por siempre. Tambien por munchos anyos, los djudios ke kedaron dieron importansa a integrarsen a la kultura jenerala: desharon de avlar ladino, tomaron nombres turkos, i mandaron a los ijos i las ijas a estudiar en universitas adientro i afuera del pais. Entre esto todo, paresia ke todo lo del pasado se iva despareser, i ke kon tiempo no iva kedar nada de la larga istoria i la rika kultura partikolar de los djudios Izmirlis.
Ma avagar avagar empesimos a sintir de algunas aktividades, lavoros emportantes en la sivdad para evitar este kamino; un verdadero despertamiento a la realidad de lo ke estava akontesiendo. Enprimero estas aktividades fueron konsentradas en la restorasion de las sinagogas de la vieja djuderia. Este projekto, inisiado por a fondasion Kiriati de Israel, apoyado de la komunidad djudia i la munisipalidad de Izmir, kon ayudo finansial de entitades internasionales tambien, es dirijido por Nisim Benjoya (el kual en 2021 dio una konferensia para la Ermandad Sefaradi de l’Amerika via Zoom ande ekspliko el progreso del projekto.) Ma desde entonses uvo unos desvelopamientos maraviyozos, kon lavor no solo de ombres, ma puedeser dainda mas de mujeres i mansevos. El mas muevo projekto lo arekoje todo esto i lo prezenta en un sitio de web, en turko i en inglez, kon el nombre ke merese – “DESPERTAR IZMIR” (adreso, para en inglez: https://izmirjcc.org/eng) establesido i dirijido por el manseviko Ceki-Jacob Hazan.
No vos puedo dizir (ma vo tratar de dizir, en kurto) lo muncho i bueno ke vash a topar en este sitio si klikash a kada uno de los ocho grupos en el “menu”. Izmir Jewish Heritage Project trata de la restorasion de las sinagogas i vos da dos filmos en Youtube sovre esto. Cultural Heritage Sites vos da informasiones sovre las sinagogas i otras fraguas enteresantes en las dos partes de la sivdad ande bivieron munchos djudios: la primera djuderia en el sentro de la sivdad, i lo ke esta desinyado komo “la segunda djuderia”, ke es Karatash, el kartier ande nasi i kresi yo. Historic Figures vos da las biografias de 14 personajes importantes en la istoria de los djudios de Izmir. I el Izmir Rabbinic Books Collection vos konta la istorya de komo se salvaron los viejos livros de la biblioteka de la hahamhane (kaza del rabinato) kon la gran lavor de Dina Eliezer. Tiene fotos i muncho mas. Self-Guided Audio Tours vos da informasiones para abashar del internet giyas gravadas en audio para los lugares de entereso djudio en Izmir, i mezmo unas “aplikasiones” de esto.
Kuatro anyos antes Nisim Benjoya inisyo un Festival de Kultura Sefaradi de Izmir ke se aze entre los dias de Hanuka kada anyo.
En la seksion de Izmir Sephardic Culture Festival vash a topar munchas enformasiones, fotos i filmos de los festivals pasados, i tambien informasion para los ke keren toparsen en Izmir i partisipar al sinken Festival ke tendra lugar del 7 al 15 septembre de 2023. Izmir Sephardic Cuisine vos da el trasfondo del elegante livro de komidas sefaradis ke fue preparado por un grupo de mujeres, el buto de este esforso, i el kontenido del livro kon foto i informasion de komo i de ande merkarlo. I finalmente, en Book: The Jews of Ottoman Izmir vimos enformasiones, videos, i tekstos de kritikas del livro kon este titolo eskrito por Dina Danon.
Aparte de esto todo ay dainda muncho mas en la version en turko del sitio, ke es izmirjcc.org. Por egzemplo, de aki vide unos videos muy enteresantes ke agora se topan kon subtitolos en inglez. Entre estos vos rekomendo ver el de las ovras sosialas de las mujeres sefaradis de Izmir en YouTube i un otro sovre la muzika sefaradi (filmo echo por un turko non-djudio).
Por esto todo, i por lo ke dainda esta lavorando a perfeksionar el sitio de izmirjcc.org, felisitamos a Ceki Hazan, i tambien felisitamos a todos los Izmirlis ke estan lavorando para el benefisio de sus komunidad i para dar a konoser lo ke fue la istoria i es la kultura de los djudios Izmirlis. Todo bueno ke les de el Dio.
Comments