La Novia del Muerto

Eskrito por Elia Karmona i transliterado por Miriam Sherman

Romanos Sensasional

Kompuesto por: Elia R. Karmona, Direktor del Djugetón

Ideado por Yitshak Rafael Mizrahi

5684 Presio del número 100 parás

Imprimería El Djugetón

Estanbol Sultán Hamam Mesadik Han Nu. 11

(transliterado por Miriam Sherman, Aaron Shapiro i Sarah Schrire)

Kapitulo 1

Antes de empesar la istoria, vo presentar alos lektores la famiya del Barón Gastón De Foat.  El Barón Gastón De Foat era un riko milionario en París ke aviendo morido ala edad de 55 anyos, deshava una bivda de 47 anyos yamada Emilia, i una ija de 19 anyos yamada Lina.  Una tresera persona avía en esta kaza, era el djoven Sharl aedado de 25 anyos, ijo dela ermana de la baronesa, ke entrava i salía siempre en la kaza de su tía. 

Estos son los tres miembros importantes ke komponen esta famiya, i una vez ke ya vo los prezentí, pasemos si vos plaze al salón de vijita de la Baronesa Emilia por ver lo ke se está pasando el día del 14 mayo 1817 alas oras 4 después de medio día.

El salón es yeno de djente, todos riendo i burlando.  Enmedio se ve una meza yena de redomas de shampanya, kopas finas, platos de porselana i frutos diferentes.

Ké fiesta puede aver en esta kaza enel treser anyo de bivdés de la Baronesa?

Es el despozorio dela Senyorita Lina kon el simpátiko djoven Armand Jefel, un ijo de un viejo konde, guérfano de padre i madre i teniendo una rika pozisión en el mundo finansiero de París.

Después de un amor sinsero mientras kuatro anyos entre Armand i Lina, el despozorio tuvo lugar ala kontentés de todos los dos i de los amigos dela famiya.

A verdad dezir, después de kuatro anyos de amor, un despozorio ya aze alegrar tanto al uno komo al otro.  Es por esto ke la Senyorita Lina, muy kontente de aver reushido en su eskojimiento, dava un pranso en este día i invitava a todos los amigos.

Desde las oras 3 después del medio día fin las oras 8, todos komían i bevían i en kada vazo ke tomavan, ivan felisitando al novio i a la novia.

Kuando la eskuridad dela noche empesó a apareser, todos los invitados empesavan a saludar i kada uno apretava la mano del novio i de la novia en felisitándolos.

Kuando vino el torno de Sharl para saludar, él saludó al novio y parándose delantre la novia, le espandió la mano en diziéndole a boz basha:  

– Kerida prima, no te vo felisitar, este korasón tuyo es a mí ke deve apartener i no a Armand.

– Kayado, Sharl!  No me digas esto!  Mi korasón ya está vendido a Armand, i ningún otro puede tomar lugar.

– Lo veremos!

I apretando la mano de su prima, Sharl se retirava.