Kada persona ke se konsidera sefaradi deve ver i sintir el deskurso ke izo la profesora Doktora Paloma Diaz-Mas en su entrada a la Real Akademia Espanyola RAE el dia de 6 Novembre, 2022. Desde akel dia, la profesora Diaz-Mas okupa la siya “i” de la RAE, una institusion ke tiene solo 46 miembros, lo mas akademikos distingidos en sus profesiones.
Aki vos kero akodrar ke en el Enkontro de Alhad del 28 augusto 2022[i], Paloma fue mi “musafira” ande, avlando en un perfekto ladino, mos avia dicho ke su deskorso en la seremonia de su entrada a la RAE el 6 Novembre iva ser relasionada kon la lingua djudeoespanyola, ma no mos dio mas detalyos. Agora vos dire yo: Avlo (en la grande parte de su konferensia) sovre ovras sientifikas i tekstos ke eksplikan sensia en djudeoespanyol del siglo 16 asta el 20.
Si, ovras i tekstos de sensia! Fue una doza de milizina para kurar los ke kreyen ke el ladino era lingua limitada a la famiya, la kaza, la vida kotidiana i relijioza de las komunidades sefaradis!
Entre muncho mas, la profesora Paloma konto de Moshe Almosnino ("desendiente de djudios ekspulsados de Huesca” nasido en Salonik, murio en Estambol) i sus ovras, “Cronica de los Reyes Otomanos” (1566) i "Rejimiento de la Vida” i sus eksplikasiones de matematika, klima, injenieria, i mas. Avlo del mediko Daniel de Avila, i su “Dialogo del colorado” (1601, Salonika) ke no trata de la kolor, si no ke de la malatiya yamada eskarlatina (scarlet fever en inglez) ke estava en epidemia entonses. Trato tambien del Meam Lo’ez , livro Bereshit de Yakov Hulli, ande se topa eksplikasiones de anatomia, astronomia, fizika, i mas. (Dio a entender ke Me’am Lo’ez kijo dizir “de djente ke no avla ebreo” i tambien pronunso el nombre HULI asegun se deve, i no komo otros lo sitan komo “Kuli”! )
Paso tambien a 1778 kuando David Atias publiko “Guerta de Oro” en Livorno, i a Saadi Besalel Halevi en los finales del siglo 19, i ansi asta 1922 kuando el doktor Albert Shaul publiko en Estambol “Livro de ijién"(hygiene).
Esto todo la profesora lo izo no solo para dar a konoser las ovras i la sensia kontenida en eyas, ma tambien para mostrar la evolusion del djudeo espanyol durante estos 4 siglos, sinyalando las influensas de otras lenguasi las inovasiones linguistikas en estas ovras,
I ke emportansia tiene todo esto para los espanyoles akademikos ke konstituen la REA? Asegun les apunto la profesora Paloma Diaz a los miembros i invitados de la RAE (en kastiliano): "pero su historia nos hace comprender mejor la nuestra, nos reconocemos en ellos”.
Ellos (eyos) semos mozotros, los sefaradim ke avlamos muestro partikolar “espanyol”.
Comments