El 26 de Febrero no pudimos selebrar el Dia Internasyonal del Ladino/Judeo-Espanyol, Estambol por modo ke el paiz entero esta vamos en dolyo achakes del terrivle rash ke uvo en el sud-este de Turkiya. Mas de kuarenta mil almas muryeron o kedaron debasho de los edifisios ke se derrokaron. Una desgrasia total. Ke sus almas repozen en Ganeden!
Rachel Amado Bortnick iva ser muestra konferensiante prinsipal en el DIDL de este anyo. El bilyeto ya fue merkado, el otel fue rezervado ama a la fin tu vimos ke dizirle a Rachel ke el DIDL se va azer el 5 de Novembre, si kere el Dio. Ama Rachel mos disho ke tanto se guluzuneyo ke una vez ke el bilyeto ya estava merkado, eya kere vinir a Turkiya en la data ke aviyamos desidido. I ansi fue. Kuando los miembros del Sentro Sefaradi oyeron ke Rachel iva vinir, todos kijieron konoserla i avlar kon eya i mozotros organizimos una reunyon Martes, el dia 28 de Febrero en el Şalom. Munchas de muestras amigas me telefonaron en diziendo ke keren traer tratamientos para la reunyon i yoles dishe ke akseptamos kon grande plazer. Mozotros nunka refuzamos si ay kozikas ermozas de komer! El Martes, yo me fui al otel de Rachel para tomarla i mos fuimos al Şalom en andando i maraviyandomos de todos los trokamientos ke uvo durante los anyos entre Harbiye i Osmanbey. Mas de 25 personas vinieron a la reunyon para konoserla a Rachel “en vivo” porke todos ya la konosen de los zoomes. Todos se ennamoraron de su ermozura, elegansia i saviduria i todos la sintieron kon muncha atansion. La ermozura fue ke durante 2 oras se avlo solo en Ladino i mos ambezimos todos kozas muevas.
Las dulsuryas ke trusho Ida Benromano, spesialidades de Edirne tuvieron muncho sukse mizmo komo las borekas i biskochos ke izo Hayim Behmoaras kon sus manos, el kek marbre de Anet Pase, la semola de Forti Barokas, todo todo estava una maraviya. Bendichas manos!
Uvo tambien musafiras komo Eti Ojalvo i Viki Diler i su marido, todos mansevos, ke se ambezaron el Judeo-Espanyol muevamente i muy bueno i ke keren absolutamente prezervar esta lingua ermoza. Ke alegriya!
La reunyon turo mas de dos oras i dingunos no se keriyan ir tanto estava interesante lo ke se estava avlando. Todos disheron ke les kedo la savor en la boka. A mi lo mas ke me plazyo fue ke se avlo solo en Ladino i ke todos avlaron a uno a uno kuando vino su sira de dizir una koza. Rachelika, esta vinida ke tenga ermanos i te asperamos para Novembre tambien.
Comments